مِزْگِينْ ژِ مَه رَا بێتِ ژِ سُڕْ شِێرِينێ
جَانێ خُوه يێ شِیرِينْ دِدِرِمْ مِزْگِينێ
Mizgîn ji me ra bêt ji surşêrînê
Canê xwe yê şêrîn didirim mizgînê
سَدْ «چِينْ» دِ خُوه دَا گِرْتِيَه زُلْفَا تَه بْچِينْ
شِعْرَا مَه دِ حَقْ لَوْ چُو حَتَّا «مَاچِينێ»
Sed çîn di xwe da girtiye zulfa te bi çîn
şi’ra me û heq lew çû heta Maçînê
نَقْشێنْ فَلَكَانْ گُهْ دِدِرِنْ ڤێ نَظْمێ
تَنْهَا نَه بَشَرْ هَرْ دِكِرِنْ تَحْسِينێ
Neqşên felekan guh didirin vê nezmê
Tenha ne beşer her dikirin tehsînê
عِشْقێ ژِ خُدێ دَا تُو بِخُوازِی ژێرا
گَرْ دێ لِ نَيَارَكْ خُوه بِكِی نِفْرِينێ
’Işqê ji xwidê da tu bixwazî jê ra
Ger dê li neyarek xwe bikî nefrînê
يَكْ سَجْدَه تَنێ فَرْضَه دِ دِينێ عِشْقێ
بِنْ بَرْ قَدێ يَارێ دِ مَجَالێ دِينێ
Yek secde tinê ferd e di dînê ’işqê
Bin berqedê yarê di mecalê dînê
عَاشِقْ كُو بِدِلْ فَاتِحَهيَا عِشْقێ خُوَانْدْ
آيَاتِ يَكَايَكْ دِكِرِنْ آمِينێ
’Aşiq ko bi dil fatiheya ’işqê xwand
Ayatê yeka yek dikirin amînê
مَه ژْ لَعْلێ لَبێ يَارێ ڤَخُوارْ آڤْ حَيَاتْ
أَغْيَارِ بِلَا تێکِ بِچِنْ دَارِينێ
Me ji le’lê lebê yarê xwe vexwar ava heyat
Exyar-i bila têk-i biçin darînê
لَازِمْ بِخُوه آيِينَهيێ (رُوحُ الْقُدْسِ)ی تُو
لَوْ كَسْ نَدِيِنْ حُورِی بِڤێ آيِينێ
Lazim bi xwe ayîneyê Rûhi l-qudus î tu
Lew kes nedîn horî bi vê ayîneyê
جَائِزْ بِتَه (مِنْ حَيْثُ بَشَرْ) نِسْبَتْ دَانْ
بِهْنُ و شَفَقُ و نَازِكِيَا نَسْرِينێ
Caiz bi te min “heysu l-beşer” nisbet dan
Bihn û şefeq û nazikiya nisrînê
أَفْرَنْگَه فَصَاحَتْ ژِ بَشَرْ شِعْرِ حَلَالْ
اِعْجَازێ بَيَانْ آنِيَه بَرْ تَدْوِينێ
Ev rengê fesahet ji beşer sihrê helal
I’cazê beyan aniye ber tedwînê
دَا نَالَه وُ آهێنْ مَه ژِ دِلْ صَحْ بِكِرِی
وَرْ گُهْ بِدَه هِنْدَاڤِ سَرێ بَالِينێ
Da nale û ahên me ji dil şeh bikirî
Wer guh bide hindavê serê balînê
فَرْهَادِ دِزَانِتْ تُو ژِ پَرْوِيزِ مَپِرْسْ
أَطْوَارێ غَمێ عِشْقُ و سُڕَا شِرِينێ
Ferhad-i dizanit tu ji Perwîz-i mepirs
Etwarê xema ’işq û sura şêrînê
بێ نُقْطَه نَهِنْ دَائِرَه اِحْسَانْ كَه «مَلَا»
دَوَّارِ چِه كِتْ دَائِرَهيَا تَكْوِينێ
Bê nuqte nehin daîre ihsan ke Mela
Dewwarê çi kit daîreya tekwînê
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
