اَیْ شَهِنْشَاهێ مُعَظَّمْ حَقْ نِگَهْدَارێ تَه بِی
سُورَهيێ (إِنَّا فَتَحْنَا) دۆرُ و مَادَارێ تَه بِی
Ey şehinşahê mu’ezzem heq nigehdarê te bî
Sûreyê “inna fetehna” dor û madarê te bî
هَرْ كَنَارێ پێڤَه وَرْگێرِی عِنَانێ هِمَّتێ
زُهْرَه بِی پَیْكێ تَه وُ كَیْوَانْ رِكێبْدَارێ تَه بِی
Her kinarê pê ve wergêrî ’inanê himmetê
Zuhre bê peykê te û Kêwan rikêbdarê te bî
دَائِمَا مَنْزِلْگَهَا سُورَا تَه بِتْ «بُرْجَا شَرَفْ»
طَالِعێ فَرْخُنْدَه وُ بَخْتێ سَعِيدْ يَارێ تَه بِی
Dayima menzilgeha sûra te bit birca şeref
Tali’ê ferxende û bextê se’îd yarê te bî
سَبْعَهيێ سَیَّارَه وُ نَهْ چَرْخێ سَرْگَرْدَانْ بِڤێ
گَرْدِشُ و دَوْرێ عَجَبْ دَرْ خِدْمَتُ و كَارێ تَه بِی
Seb’eyê seyyare û neh çerxê sergerdan bi vê
Girdiş û dewrê ’eceb der xizmet û karê te bî
مَاهِتابَا دَوْلَتێ يَكْ پَرْتَوَكْ شَمْعَا تَه بِتْ
آفِتَابَا رَفْعَتِی بَرْقَكْ ژِ اَنْوَارێ تَه بِی
Mahitaba dewletê yek pertewek şem’a te bit
Afitaba ref’etê berqek ji enwarê te bî
لَامِعێ فَتْحَا اَزَلْ بَرْقێ ژِبَرْ تَاجێ تَه دِتْ
كَوْكَبَا سَعْدَا أَبَدْ نَجْمَكْ ژِ سَیَّارێ تَه بِی
Lami’-i fetha ezel berqê ji ber tacê te dit
Kewkeba se’da ebed necmek ji seyyarê te bî
بَرْقێ سُبُّوحِی كُو اِشْرَاقێ لِسَدْ جَانَانْ دِدِتْ
اَوْ كُو كَشْفَا دِلْ دِكِتْ رَمْزَكْ ژِ اَسْرَارێ تَه بِی
Berqê subbûhî ko işraqê li sed canan didit
Ew ko keşfa dil dikit remzek ji esrarê te bî
رَايَتَا فَتْحێ بِنَصْرَا (لَمْ يَزَلْ) مَنْشُورِ بِتْ
شَهْسِوَارێ فَرّێ سُبْحَانِی عَلَمْدَارێ تَه بِی
Rayeta fethê ji nesra te ko her menşûr-i bû
şehsiwarê ferrê subhanî ’elemdarê te bî
نَیْ تَنێ تَبْرِيزُ و كُرْدِسْتَانْ لِبَرْ حُكْمێ تَه بِنْ
سَدْ وَكِی شَاهێ خُرَاسَانێ دِ فَرْوَارێ تَه بِی
Ney tinê Tebrîz û Kurdistan li ber hukmê te bin
Sed wekî şahê Xurasanê di ferwarê te bî
گَرْچِه دَرْ اِقْلِيمێ رَابِعْ هَاتِی تَخْتێ سَلْطَنَتْ
پَادِشَاهێ هَفْتِ اِقْلِيمَانْ سَلَامْكَارێ تَه بِی
Gerçi der iqlîmê rabi’ hate textê seltenet
Padişahê heft-i iqlîman selamkarê te bî
چِيمَنَا سُلْطَانِييێ يَكْ لَالَهيَكْ بَاغێ تَه بِتْ
گُلْشَنَا خَاقَانِييێ خَارَكْ ژِ گُلْزَارێ تَه بِی
çîmena sultaniyê yek laleyek baxê te bit
Gulşena xaqaniyê xarek ji gulzarê te bî
اێ ژِ اَمْرێ تَهێ مُكَرَّمْ سَرْكَشِی كِتْ شُبْهێ شَمْعْ
بَرْ سَرێ تِيغێ تَه وُ مَقْتُولێ مۆكَارێ تَه بِی
Ê ji emrê tey mukerrem serkeşî kit şubhê şem’
Ber serê tîxê te û meqtûlê mûkarê te bî
شَاهِبَازْ أرْ چَنْدِ پَرْوَازێ بِ بَالَا بِێتُ و رَتْ
اَوْ دِ نێڤْ تۆرَا تَه بِيتُ و صَیْدێ شُنْقَارێ تَه بِی
şahibaz er çend-i perwazê bi bala bêt û ret
Dê di nêv tora te bêt û seydê şunqarê te bî
شَاهێ پُرْهَيْبَتْ دِ دێرِتْ لێ بِسَهْمێ زێدَهَا
سَاعَتَا غَفْلَتْ خُيَا بِی كُوزْ دِبِنْ بَارێ تَه بِی
şahê pirheybet didêrit lê bi sehmê zêde yî
Sa’eta xeflet xwiya bî kûz di bin barê te bî
هَرْ سَرێ دَوْلَتْ هَبِتْ دێ هَرْ دِ نێڤْ بَنْدَا تَه بِتْ
هَرْ كَسێ عَاقِلْ بِتِنْ دێ هَرْ دِ چُوكَارێ تَه بِی
Her serê dewlet hebit dê her di nêv benda te bit
Her kesê ’aqil bitin dê her di çokarê te bî
اێ دِڤێ آزَادَه بِتْ دێ چَهْڤَنێرْ لُطْفَا تَه بِتْ
هَرْچِه اِسْتِغْنَا دِ دِلْ بَرْ مِنَّتُ و پارێ تَه بِی
Ê divêt azade bit dê çehvnêrê lutfa te bit
Herçi istixna di dil ber minnet û parê te bî
هَرْ كَسێ قَسْتَكْ دِ دِلْ دێ قَسْتێ دَرْگَاهێ تَه كِتْ
اێ دِ خَاطِرْ اَرْجُو كِتْ دێ هَرْ رَجَاكَارێ تَه بِی
Her kesê qestek di dil dê qest-i dergahê te kit
Ê di xatir ercû kit dê her ricakarê te bî
اێ نَه دَوْلَتْخُواهێ حَضْرَتْ بِتْ ژِ نِيڤَا جَانُ و دِلْ
شُبْهَتِی اَهْلێ شَقَا بَرْ قَهْرُ و آزَارێ تَه بِی
Ê ne dewletxwahê hedret bit ji nêva can û dil
şubhetê ehlê şeqa ber qehr û azarê te bî
مَا بِ عَيْشُ و نۆشُ و شَاهِی اَوْ فِدَا عُمْرێ تَه بِتْ
چَنْدَكِی سَالَكْ مُجَدَّدْ پێتِ بێ زَارێ تَه بِی
Ma bi ’êş û noş û şahî ew qeder ’umrê te bit
çendekê salik mucedded bêt û bêzarê te bî
هَرْ كَسێ نَه ژْ جَانْ دُعَاگۆ وُ ثَنَاخُوانێ تَه بِتْ
گِرْتِيێ قَیْدَا تَه وُ آمَانْجێ نُوبَارێ تَه بِی
Her kesê ne j’can du’ago û senaxwanê te bit
Girtiyê qeyda te û amancê nûbarê te bî
مَدْرَكێ عِلْمێ ضَمِيری شَمَّيَكْ وَصْفَا تَه هَاتْ
وَرْنَه كی عَالِمْ بِ شَأْنێ قَدْرُ و مِقْدَارێ تَه بِی
Medrekê ’ilmê demîrê şemmeyek wesfa te hat
Wer ne key ’alem bi şe’nê qedr û miqdarê te bî
قَسْتُ و دَاخُوازَا «مَلێ» دَائِمْ ژِ جَانُ و دِلْ أَڤَه
هَرْ دِ بَنْدَا خِدْمَتێ پێشْدَسْتێ دِيدَارا تَه بِی
Qest û daxwaza Melê da’im ji can û dil ev e
Her di benda xizmetê pêşdestê dîdarê te bî
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
