Ji remza dilberê dîsa
Li min batin vejîn derde
Di lebsê tariyê min dî
Xwiya bû ew siyahcerde
Di lebsê tarî û nûrê
Perîrengê sifethorê
Ji Wadî eymena torê
Muqeddes kir li min ’erd e
Ji nar û nûrê teqdîsê
Tecella kir li min dîsê
Li ser textê xwe Belqîsê
Hilanîn bêhicab perde
hicab û perde avêhtin
Seba reyhan hilavêhtin
Ji bircan tîr-i pir rêhtin
Gihan min rast û çep cerde
Kirim amancê mizraqan
Di dil da tîr-i çûn faqan
Bi celladê xwe ew xaqan
Dibêjit hêj tu xencer de
Bi derbên xenceran kuştîn
Bi xwîna şohr-i lê miştîn
Di çîna sinbilên qişt în
Me dil pir misk û mawerd e
Gulên her misk-i ezfer lê
’Ebîr û ’enberê ter lê
Semaya sosinan her lê
Bi zulfan mat û mawer de
Bi serwê sinbilên tarî
Bi hev ra bazî û yarî
Bicû da xwîn bibit carî
Ji qewsan gezmeyan berde
Ez im amancê wan tîran
Ji peykanan û sertîran
Bûyim polad li ber şîran
Seraser têk-i mam ber de
Ko dilber hate vê yolê
Ji ber pir hin ketin çolê
Ji qencan ko revand holê
Ji mehbûban birin nerde
Ji qedd û bejn û balayê
Ji reng û dêm û sîmayê
Tirengî qet xeber nayê
Di husnê cewherek ferde
Bi xeml û reng û re’nayê
Bi mehbûbê bi zîbayê
Bi ew husna xwidê dayê
Ji gulrengan gula zer de
Nebat û şekkera lêvê
Nesîmê wê gul û sêvê
Hilînit perdeya şêvê
şifaya hindekê derd e
Ji neqş û şun’ê cebbarî
Muterra turreya tarî
Li nûrê miskê tatarî
Li ser wan xemriyan berde
Li ber rojê bibit xêlî
Binêrim qameta ’êlî
Qedîf û zerkeşê têlî
Zubad û misk û ’enber de
Bi sîmavê bi zêravê
Tu rojê neqşikê bavê
Ko da Erjeng ji wê navê
Li ber rojê nebit perde
Eger berqek ji wê rojê
Ji ber wê ’iqd û bişkojê
Bidit qelbî wekî dojê
Li ber dojeh dibit berd e
Di meydanê şirînxencan
Biçerxin mislê şetrencan
Turaba ber pêyê qencan
Zubad û ’enberên gird e
Dibit bêjin wî sultanî
Bi heft ayatê furqanî
Li mehbûban tu xaqan î
Were derbê li qeyser de
Mela zanim ji meczûban
Tinê najî tu bê xoban
Dema dil dî bi mehbûban
Bi şox û şeng û esmer de
Dema cellad-i bên bazî
Bi şîr û xencerên tazî
Li dergeh da nekî gazî
Delal û naz û perwer de
Emanet da ji bêhoşî
Durên nasufte nefiroşî
Mela zanim ji medhoşî
Te dil bê xwab û bê xwird e
ژِ رَمْزَا دِلْبَرێ دِيسَا
لِمِنْ بَاطِنْ ڤَژِينْ دَرْدَه
دِلِبْسێ تَارِيێ اِيسَا
خُيَا بُو أَوْ سِيَهْ چَرْدَه
دِلِبْسێ تَارِیُ و نُورێ
پَرِی رَنْگێ صِفَتِ حُورێ
ژِ وَادِی أَیْمَنَا طُورێ
مُقَدَّسْ كِرْ لِمِنْ عَرْدَه
ژِنَارُ و نُورێ تَقْدِيسێ
تَجَلَّا كِرْ لِمِنْ دِيسێ
لِسَرْ تَخْتێ خُوه بَلْقِيسێ
هِلَانِينْ بێ حِجَابْ پَرْدَه
حِجَابُ و پَرْدَه آڤێهْتِنْ
صَبَا رَیْحَانْ هِلَاڤێهْتِنْ
ژِ بُرْجَانْ تِيرِ پُڕْ رێهْتِنْ
گِهَانْ مِنْ رَاسْتُ و چەپْ جَرْدَه
كِرِمْ آمَانْجێ مِزْرَاقَانْ
دِ دِلْ دَا تِيرِ چُونْ فَاقَانْ
بِجَلَّادێ خُوه أَوْ خَاقَانْ
دِبێژِتْ : هێژْ تُو خَنْجَرْ دَه
بِدَرْبِێنْ خَنْجَرَانْ كُشْتِينْ
بِخُونَا سُهْرِ لێمِشْتِينْ
دِچِينَا سُنْبُلێنْ قِشْتِينْ
مَه دِلْ پُڕْ مِسْكُ و مَاوَرْدَه
گُلِێنْ هَرْ مِسْكێ أَذْفَرْ لێ
عَبِيرُ و عَنْبَرێ تَڕْ لێ
سَمَايَا سۆسِنَانْ هَرْ لێ
بِزُلْفَانْ مَا تَه مَاوَرْدَه
بِسَرْ وێ سُنْبُلێنْ تَارِی
بِهَڤْ رَا بَازِیُ و يَارِی
بِجُۆ دَا خُونْ بِبِتْ جَارِی
ژِ قَوْسَانْ گَمْزَيَانْ بَرْدَه
أَزِمْ آمَانْجێ وَانْ تِيرَانْ
ژِ پَیْكَانَانُ و سَرْتِيرَانْ
بِبِمْ پُۆلَا لِبَرْ شێرَانْ
سَرَاسَرْ تێکِ مَامْ گَرْدَه
كُو دِلْبَرْ هَاتَه ڤێ یۆلێ
ژِ بَرْ پُڕْ هِنْ كَتِنْ چۆلێ
ژِ قَنْجَانْ گَۆ رَڤَا هۆلێ
ژِمَحْبُوبَانْ بِرِنْ نَرْدَه
ژِ قَدُّ و بَژْنُ و بَالَایێ
ژِ رَنْگُ و دێمُ و سِيمَایێ
تُو رَنْگِی قَطْ خَبَرْ نَایێ
دِحُسْنێ جَوْهَرَكْ فَرْدَه
بِخَمْلُ و رَنْگُ و رَعْنَایِی
بِمَحْبُوبِی ، بِزِيبَایِی
بِأڤْ حُسْنَا خُدێ دَایِی
ژِ گُلْ رَنْگَانْ گُلَا زَرْدَه
نَبَاتُ و شَكَّرَا لێڤێ
نَسِيمێ وێ گُلُ و سێڤێ
هِلِينِتْ پَرْدَهیَا شێڤێ
شِفَايَا هِنْدَكِی دَرْدَه
ژِ نَقْشُ و صُنْعێ جَبَّارِی
مُطَرَّا طُرَّه یَا تَارِی
لِنُورێ مِسْكێ تَاتَارِی
لِسَرْ وَانْ خَمْرِيَانْ بَرْدَه
لِبَرْ رۆژێ بِبِتْ خێلِی
بِنێرِمْ قَامَتَا عێلِی
قَدِيفُ و زَرْكَشێ تێلِی
زَبَادُ و مِسْكُ و عَنْبَرْ دَه
بِسِيمَاڤِی ، بِزێراڤِێ
تُو رۆژی نَقْشَكِێ بَاڤِێ
كُو دَا أَرْژَنْگْ ژِ وێ نَاڤِێ
لِبَرْ رۆژێ نَبِتْ پَرْدَه
أَگَرْ بَرْقَكْ ژِوێ رۆژێ
ژِشَوْقَا عِقْدُ و بِشْكۆژێ
بِدِتْ قَلْبِی وَكِی دۆژێ
لِبَرْ دۆژَه دِبِتْ بَرْدَه
دِ مَیْدَانَا شِرِينْ غَنْجَانْ
بِچَرْخِنْ مِثْلێ شَطْرَنْجَانْ
تُرَابَا بَرْ پِیێ قَنْجَانْ
زَبَادُ و عَنْبَرِینْ گَرْدَه
دِبِتْ بێژِنْ وِی سُلْطَانِی
بِهَفْتْ آيَاتێ فُرْقَانِی
لِمَحْبُوبَانْ تُو خَاقَانِی
وَرَه دَرْبێ لِقَیْصَرْ دَه
«مَلَا» زَانِمْ ژِمَجْذُوبَانْ
تَنێ نَاژِی تُو بێ خُوبَانْ
دَمَا دِلْ دِی بِمَحْبُوبَانْ
بِشۆخُ و شَنْگُ و أَسْمَرْ دَه
دَمَا جَلَّادِ بێنْ بَازِی
بِشِيرُ و خَنْجَرِێنْ طَازِی
لِدَرْگَهْ دَا نَكِی گَازِی
دَلَالُ و نَازِپَرْوَرْدَه
أَمَانَتْ دَا ژِ بێ هۆشِی
دُرِێنْ نَاسُفْتَه نَفْرۆشِی
«مَلَا» زَانِمْ ژِمَدْهۆشِی
تَه دِلْ بێ خُوَابُ و بێ خُورْدَه
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Dîvanı, Şiirleri ve Kasideleri. Klasik Kürt edebiyatının başyapıtı.
