أَزْ نِزَانِمْ سَبَبێ يَارێ چِرَا دُورِ كِرِينْ
شَاهێ شِيرِينْدَهَنَانْ أَمْ ژِ خُوه مَهْجُورِ كِرِينْ
Ez nizanim sebebê yarê çira dûr-i kirîn
şahê şîrîndehenan em ji xwe mehcûr-i kirîn
شُبْهێ گُۆ بێ سَرُ و پَا بُومَه لِبَرْ دَرْبُ و شَكَانْ
لَوْ بِچَوْگَانێ جَفَايَا خُوه ژِ دِلْ هُورِ كِرِينْ
Mislê goy bê ser û pa bûme li ber derb û şekan
Lew bi çewganê cefaya xwe ji dil hûr-i kirîn
دَا مَه سَدْ جَامێ فِرَاقێ ژِ خُوه غَائِبْ نَبُويِينْ
ژِ وِصَالێ قَدَحَكْ دَا مَه وُ مَخْمُورِ كِرِينْ
Da me sed camê firaqê ji xweh xa’ib nebûyîn
Ji wisalê qedehek da me û mexmûr-i kirîn
نُورێ چَشْمێ مَه كُو عَالَمْ مَه بِچَشْمێنْ تَه دِدِی
بِجَمَالَا خُوه تَه وَكْ دِيدَهيێ بێ نُورِ كِرِينْ
Nûrê çeşmê me ko ’alem me bi çeşmên te didî
Bi cemala xwe te wek dîdeê bênûr-i kirîn
نَفَسَكْ بێ تَه مَه نَاچِی نَدِژِينْ بێ تَه دَمَكْ
ژِ تَه هَاتْ أَمْرێ هُمَايُونْ تَه وَه مَأْمُورِ كِرِينْ
Nefesek bê te me naçî ne dijîn bê te demek
Ji te hat emrê humayûn te weh me’mûr-i kirîn
مَه دِزَانِی كُو تُو دێ ﴿عَاقِبَةُ الأَمْرِ﴾ چِه كِی
لَبێ لَعْلێ شَكَرِينْ آهِ كُو مَغْرُورِ كِرِينْ
Me dizanî ko tu dê ’aqibeti l-emr-i çi kî
Lebê le’lê şekirîn ahi ko mexrûr-i kirîn
ذَرَّيكْ بُومْ دِ هَوَايَا تَه دِ وێرَانَيَكِی
مِثْلێ رۆژێ بِشُعَاعَا خُوه تَه مَشْهُورِ كِرِينْ
zerreyek bûm di hewaya te di wêraneyekê
Mislê rojê bi şu’a’a xwe te meşhûr-i kirîn
ژِ ﴿أَنَا الْحَقْ﴾ بِلَبێنْ لَعْلِ خَبَرْدَارِ بُويِينْ
بِكُلَابَا سَرێ زُلْفَا خُوه تَه مَنْصُورِ كِرِينْ
Ji ene l-heq bi lebên le’lê xeberdar-i bûyîn
Bi gulaba serê zulfa xwe te Menşûr-i kirîn
مُنْصَرِفْ مَا دِبُويِينْ أَمْ بِدُو سَدْ جَارَّی مَلَا
لێ بُوێ كَسْرُ و إِضَافێ ڤِخُوه مَجْرُورْ كِرِينْ
Munşerif ma dibûyîn em bi dused car-i Melê
Lê bi wê kesr û idafê vi xwe mecrûr-i kirîn
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
