Kes ned’ye sehergeh ko çi nazikweres î tu
Me j’ belgê gul û nêrgizê sermest-i bes î tu
Zanim ne tinê ko yedê beyda tu didêrî
Wer xweş ke şehîdên xwe ko ’îsanefes î tu
Rûh î tu ne cism î ji cemalê bi çi ismî
Reng-i reng-i tibî keşf û şuhûdê çi kes î tu
Roj î tu li şerq î bi cemala xwe we berq î
Bi l-lah ko ji ser çeşmeyê eqdes qebes î tu
Bi l-lah ji çi nûr î we tecella li çi tor î
Geh geh li seraperdeyê can multemes î tu
şemsa felek î ya melek î hê jî nizanim
Horî û perî ya bi xwe Rûhu l-qudus î tu
Cana ceres û rehberê ’işqa te ez im qet
Ageh bi fixan û herekatê ceresî tu
Ma yek nefesek min dibitin bê tu wucûdek
Dê bê te çi bim hem tu ruh î hem nefes î tu
’Işqa te me go zêrisifet zerd kirîn go
Iksîr e evîna me bi ’eynî we mes î tu
Min go ji nigaran tu gul î bes bişukuh be
Zanim ne muhib her ne kes û xarûxes î tu
Ey horîsiriştê li me xweş meywe te ber kir
Cennat e di wesla te we ateşperes î tu
Min go di şevan şubhê nucûman bi tewaf în
Go ’işwe dizanin bi çi qest û hewes î tu
Min go me bi tîxan vedê nakin ji derê te
Go em ji nebat în we li teb’ê meges î tu
Min go ji kemenda serê zulfa te verestim
Perwazê lebê le’lê me go ger veresî tu
Yekdem venehiştîn te di hamûnê firaqê
Bê hemdemê derdan ko çi firyadres î tu
Min go ji dilê şubhê bixûr xweş te bi ker kir
Ker kir bi du le’lên xwe şeker go ’edes î tu
Min go li rexan în neko kecrew weko ferzîn
şah gote mi kiş mat-i li baz-i feres î tu
Min go te divê ser ji reqîbî bibirim ez
Go min diye zanim dibirî jê meqes î tu
Ta çend-i bixef bade binoşî we nefes da
îca bi def û ney were mîrê ’eses î tu
Min go ji qedîm ez meyê ’işqa te dinoşim
Go min ji ’uşaqan ne tinê mey teles î tu
Min go di şevan şubhê şemalan we disojin
Perwanesifet ca here bê şewt û his î tu
Min go beşer û quwwetê sem’a mi tu yî go
Zanîn te em în rûh û mucerred qefes î tu
Te ji zulfê butan şihhet Mela reştir e tali’
Yarê te seher bêt û biret pê nehesî tu
كَسْ نَدْيه سَحَرْگَهْ كُو چِه نَازِكْ وَرَسِی تُو
مَه ژْ بَلْگێ گُلُ و نێرْگِزێ سَرْمَسْتِ بَسِی تُو
زَانِمْ نَه تَنێ كُو یَدێ بَيْضَا تُو دِدِيرِی
وَرْ خُوشْ كَه شَهِيدێنْ خُوه كُو عِيسَانَفَسِی تُو
رُوحِیُ و نَه جِسْمِی ژِ جَمَالێ بِچِه اِسْمِی
رَنْگْ رَبِّ دِبێ كَشْفُ و شُهُودێ چِه كَسِی تُو
رۆژِی تُو لِشَرْقێ بِجَمَالَا خُوه وُ بَرْقێ
بِاللّٰهْ نَه ژِ سَرْچَشْمَهيێ أَقْدَسْ قَبَسِی تُو
بِاللّٰهُ ژِ چِه نُورِیُ و تَجَلَّا لِچِه طُورِی
گَهْ گَهْ لِسَراپَرْدَهيێ جَانْ مُلْتَمَسِی تُو
شَمْسَا فَلَكِی يَا مَلَكِی هێژِ نِزَانِمْ
حُورِیُ و پَرِی يَا بِخُوه (رُوحُ الْقُدُسِ)ی تُو
جَانَا ! جَرَسُ و رَهْبَرێ عِشْقَا تَه أَزِمْ قَطْ
آگهْ بِفِغَانُ و حَرَكَاتێ جَرَسِی تُو
مَا يَكْ نَفَسَكْ مِنْ دِبِيتْ بێتْ و وُجُودَكْ
دێ بێ تَه چِه بِمْ هَمْ تُو رُحِی هَمْ نَفَسِی تُو
عِشْقَا تَه مَگَرْ زێرِصِفَتْ زَرْ دِكِرِينْ گۆ:
لِ حَسِيرَه أَڤِينَا مَه بِعَيْنِی وُ مَسِی تُو
مِنْ گۆ : ژِ نِگَارَانْ تُو گُلِی بَسْ بِشُكۆهْ بَه
وزَانِمْ نَه مُحِبْ هَرْ نَه كَسُ و خَارُ و خَسِی تُو
وَیْ حُورِسِرِشْتێ لِمَه خُوشْ مِيوَه تَه بَرْ كِرْ
جَنَّاتَه دِ وَصْلَا تَه وُ آتَشْپَرَسِی تُو
مِنْ گۆ : دِ شَڤَانْ شُبْهێ نُجُومَانْ بِطَوَافِينْ
گۆ : عِشْوَه دِزَانِنْ بِچِه قَسْتُ و هَوَسِی تُو
مِنْ گۆ : مَه بِتِيغَانْ ڤَدِی نَاكِنْ ژِ دَرێ تَه
گۆ : أَمْ ژِ نَبَاتِينُ و لِطَبْعێ مَگَسِی تُو
مِنْ گۆ : ژِ كَمَنْدَا سَرێ زُلْفَا تَه پَرَسْتِمْ
پَرْوَازێ لَبێ لَعْلێ مَه ، گۆ : هَرْ ڤَرَسِی تُو
يَكْ دَمْ ڤَنَهِشْتِينْ تَه دِ هَامُونێ فِرَاقێ
بێ هَمْدَمێ دَرْدَانْ كُو چِه فَرْيَادِرَسِی تُو
مِنْ گۆ : ژِ مَه دِلْ شُبْهێ بِخُورْ خُوشْ تَه بِکَرْکِرْ
کَرْکِرْ ! بِدُو لَعْلێنْ خُوه شَكَرْ گۆ : عَدَسِی تُو
مِنْ گۆ : لِ رُخَانِينْ نَه كُو كَجْرَوْ وَكُو فَرْزِينْ
شَاهْ گۆتَه مَه ، كِشْ مَاتِ ! لِبَازِێ فَرَسِی تُو
مِنْ گۆ : تَه دِڤێ سَرْ ژِ رَقِيبِی بِبِرِّمْ أَزْ
گۆ مِنْ : وَيَه زَانِمْ دِبَرێ ژِی مَقَسِی تُو
تَا چَنْدِ بِخَفْ بَادَه بِنۆشِی وَه نَفَسْ دَا
اِيجَا بِدَفُ و نَیْ وَرَه مِيرێ عَسَسِی تُو
مِنْ گۆ : ژِ قَدِيمْ أَزْ مَيێ عِشْقَا تَه دِنۆشِمْ
گۆ : مِنْ ژِ عُشاقَانْ نَه تَنێ مَیْ پَرَسِی تُو
مِنْ گۆ : دِ شَڤَانْ شُبْهێ شَمَالَانْ وَه دِسۆژِينْ
پَرْوَانَهصِفَتْ ، گۆ : هَرَه بێ صَوْتُ و حَسِی تُو
مِنْ گۆ : بَصَرُ و قُوَّتێ سَمْعَا مَه تُويِی ، گۆ:
زَانِينْ تَه أَمِينْ رُوحُ و مُجَرَّدْ قَفَسِی تُو
مِنْ گۆ : دِلُ و جَانێ خُوه ژِ زُلْفَا تَه رَهَا كِمْ
خُوشْ گۆ : چِه نَزَانِیُ و «مَلَا» گرْبِرَسِی تُو
تَه ژْ زُلْفێ بُتَانْ صَحّه «مَلَا» رَشْتِرَه طَالِعْ
يَارێ تَه سَحَرْ بێتُ و بِرَتْ بێ نَحَسِی تُو
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Dîvanı, Şiirleri ve Kasideleri. Klasik Kürt edebiyatının başyapıtı.
