دَرێ مَيْخانه يا عِشْقێ سَحَرْ عارِفْ زِيارَتْ كِرْ
بِآبێ چَشْمُ وخُونێ دِلْ وُضُو بَسْتُ وطَهارَتْ كِرْ
Derê meyxaneya ’işqê seher ’arif ziyaret kir
Bi ab-i çeşm û xwîna dil wudû best û teharet kir
وَرِێنْ جَامَا هِلالێ دا ژِ عَكْسێ مَاهێ نَوْ بِينِى
كُو خَانێ مِهْرُ وتُرْكێ چَرْخُ وخُوانێ رُوزَه غارَتْ كِرْ
Werîn cama hilalê da ji ’eksê mah-i new bînî
Ko xanê mihr û cergê çerx û xewanê roze xaret kir
بِمِيزانْ قَوْسێ مَاهێ نَوْ بِوَجْهێ دِلْبَرێ مِن دِي
ژِ جَشْمُ و گۆشَهيێ أَبْرُو بِدَۆرْ جَامێ اِشَارَتْ كِرْ
Bi mîzan qewsê mahê new li wechê dilberê min dî
Ji çeşm û guşe’ê ebrû bi dor camê işaret kir
بِأَبْصَارَانْ نَظَرْ مِنْ چُو ژِ چَرْخێ قَوْسێ أَبْرُويَانْ
شُكُرْخُوازِینْ كُو چَهْڤانْ كَارِی بَرْ عَيْنێ بَصَارَتْ كِرْ
Bi ebşaran nezer min çû ji çerxê qewsê ebrûyan
şukurxaz în ko çehvan karê ber ’eyn-i beşaret kir
ژِ بَرْ دێمِی نِقَابْ آڤێهْتُ و دَسْتُورا طَوَافێ دَا
دِ سَعْيێ بَيْتُ و اِحْرَامێ وُ مِنْ أَسْوَدْ زِيارَتْ كِرْ
Ji ber dêmê niqab avêt û destûra tewafê da
Di se’yê Beyt û ihramê we min eswed ziyaret kir
دِ دِيدَارێ هَزَارَانْ جَانْ نِثَارێ مَقْدَمێ يارِنْ
كَسێ جَانَانْ بِجَانْ بِينِتْ بِعِشْقێ وِى تِجَارَتْ كِرْ
Di dîdarê hezaran can nisarê meqdemê yar in
Kesê canan bi can bînit di ’işqê wî ticaret kir
بِدِينارێ دَنِى زِنْهَارِ دَا يارێ خُوهْ نَفْرۆشِى
كَسێ يُوسِفْ فِرۆتِى وِى دِ عَالَمْ دَا خَسَارَتْ كِرْ
Bi dînarê dinê zinhar da yarê xwe tu nefroşî
Kesê Yûsif firotî wî di ’alem da xesaret kir
تَنێ أَوْ سَجْدَهيَا شُكْرێ تَه بِتْ مِحْرَابێ قَوْسَيْنَانْ
كُو دَلْقُ و شَمْلُ و سُجَّادَه بِڤێ آڤێ قَصَارَتْ كِرْ
Tinê ew secdeya şukrê te bir mihrabê qewseynan
Ko delq û şeml û seccade bi vê avê qesaret kir
دِ بَحْثێ لَعْلێ لَبْ هَرْ خَامِ نَارِتْ طَبْعێ أَلْمَاسِى
وَلێ تَأْثِيرێ فَيْضێ مِهْره تَدْبِيرێ حَرارَتْ كِرْ
Di behsê le’l-i leb her xam-i narit teb’ê elmasê
Welê te’sîr û feydê mihrê tedbîrê heraret kir
دِ اِعْجَازَا بَيَانێ دَا سُخَنْ گَرْ بێتَه اِنْصَافێ
دِزَانِتْ مُخْتَصَرْ هَرْ كَسْ «مَلێ» سِحْرێ عِبَارَتْ كِرْ
Di i’cazê beyanê da suxen ger bête inşafê
Dizanit muxteşer her kes Melê sihre’ibaret kir
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
