صَبَاحُ الْخَيْرِ خَانێ مَنْ
شَهێ شِيرِينْ زَبَانێ مَنْ
Sebahu l-xeyri xanê min
şehê şêrîn zebanê min
تُویِی رُوحُ و رَوَانێ مَنْ
بِبِتْ قُرْبَانْ تَه جَانێ مَنْ
Tu yî rûh û rewanê min
Bibit qurban te canê min
تَعَالَى اللَّهْ چِه ذَاتی تُو
چِه وێ شِيرِينْ صِفَاتی تُو
Te’ale l-lah çi zat î tu
çi wê şêrînsifat î tu
نَه وَكْ قَنْدُ و نَبَاتی تُو
يَقِينْ رُوحُ و حَيَاتی تُو
Ne wek qend û nebat î tu
Yeqîn rûh û heyat î tu
حَيَاتُ و رَاحَتَا جَانِمْ
صَبَاحُ الْخَيْرِ يَا خَانِمْ
Heyat û raheta can im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
صَبَاحُ الْخَيْرِ مَسْتَا مِنْ
لَطِيفَا جَامْ بِدَسْتَا مِنْ
Sebahu l-xeyri mesta min
Letîfa cam bi desta min
خُمَارُ و مَیْپَرَسْتَا مِنْ
تُویِی مَقْصُودُ و قَسْتَا مِنْ
Xumar û meyperesta min
Tu yî meqsûd û qesta min
ژِ مَقْصُودَانْ تُویِی بَسْ مِنْ
بِبِنْ بَرْ چَرْخێ أَطْلَسْ مِنْ
Ji meqsûdan tu yî bes min
Bibin ber çerxê etles min
ژِ غَيْرێ تَه نَڤێتْ كَسْ مِنْ
بِرَشْتَۆزِينْ مُقَوَّسْ مِنْ
Ji xeyrê te nevêt kes min
Bi reştûzên muqewwes min
دِ بَنْدَا زُلْفێ چَوْگَانِمْ
صَبَاحُ الْخَيْرِ يَا خَانِمْ
Di benda zulfê çewgan im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ژِ وێ زُلْفێ ژِ وێ بَنْدێ
رَها بِمْ لێ ژِ پَيْوَنْدێ
Ji wê zulfê ji wê bendê
Reha bim lê ji peywendê
سِيَهْچَشْمێ سِپِی زَنْدێ
تَه سۆهْتِمْ شُبْهَتێ فَنْدێ
Siyehçeşmê spîzendê
Te sohtim şubhetê findê
شُبێ شَمْعُ و شَمالِمْ أَزْ
ژِبَرْ حُبَّا تَه لالِمْ أَزْ
şubhê şem’ û şemal im ez
Ji ber hubba te lal im ez
ضَعِيفِمْ وَکْ هِلالِمْ أَزْ
صِفَتْگۆيِینْ دِكَالِمْ أَزْ
De’îf im wek hilal im ez
Sifet goyîn dikalim ez
ڤِبُلْبُلْ رَا بِأَفْغَانِمْ
صَبَاحُ الْخَيْرِ يَا خَانِمْ
Vi bilbil ra bi evxan im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ڤِبُلْبُلْ رَا شَڤُ و رۆژی
لِ وێ طَرْحُ وبِشْكۆژی
Vi bilbil ra şev û rojê
Li ser wê terh û bişkojê
أَنِی مَاهێ شَفَقْۆژی
تَه سۆهْتِمْ شُبْهَتێ دۆژی
Enîmahê şefeq rojê
Te sohtim şubhetê dojê
کُو دُورِمْ أَزْ ژِ وێ حُورێ
تَنێ جَارَكْ لِسَرْ سُورێ
Ko dûr im ez ji wê horê
Tinê carek li ser sûrê
ژِ وَادِی أَيْمَنَا طُورێ
تَجَلَا كِرْ دِ نێڤْ نُورێ
Ji Wadî-eymena Torê
Tecella kir di nêv nûrê
ژِ وێ سۆهْتِی دِلُ و جَانِمْ
صَبَاحُ الْخَيْرِ يَا خَانِمْ
Ji wê sohtî dil û canim
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ژِ حُسْنَا وێ تَجَلّايێ
يَدَێ بَيْضَاءُ و بَالَايێ
Ji husna wê tecellayê
Yedê beyda û balayê
چِه وَصْفَانْ بێمْ خَبَرْ نَايێ
وَلێ دِلْ جَذْبَهيێ دَايێ
çi wesfan bêm xeber nayê
Welê dil cezbeyê dayê
نَه هِشْيارِمْ ژِ وێ بَرْقێ
ژِ زَرْتَاجێ لِسَرْ فَرْقێ
Ne hişyar im ji wê berqê
Ji zertacê li ser ferqê
سِپێدَه دَا هَتا شَرْقێ
بَلێ نَااِێخِمێ فَرْقێ
Spêde da heta şerqê
Belê naêximê ferqê
ژِ ضَرْبێ عِشْقێ نَالانِمْ
صَبَاحُ الْخَيْرِ يَا خَانِمْ
Ji derbê ’işqê nalan im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ظَرِيفی نَازِكی شَنْگی
صِفَتْ حُورێ پَرِی رَنْگی
Zerîf î nazik î şeng î
Sifethor î perîreng î
بِرُۆژێ را تُو هَڤْدَنْگِی
دُو رَشْتَۆزِێنْ سِيَهْيَنْگِی
Bi rojê ra tu hevdeng î
Du reştûzên siyehyeng î
کِشَانْدِنْ لێ نَه وَكْ جَارَانْ
خَدَنْگێنْ قَوْسێ نُوبَارَانْ
Kişandin lê ne wek caran
Xedengên qewsê nûbaran
ژِ رَنْگێ شِيرُ و مُوكَارَانْ
رَشَانْدِنْ سِينَه وَكْ بَارَانْ
Ji rengê şîr û mûkaran
Reşandin sîne wek baran
ژِ وێ ضَرْبێ بِإِيشَانِمْ
صَبَاحُ الْخَيْرِ يَا خَانِمْ
Ji wê derbê pir êşan im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ڤَكَه جَارَكْ خَطُ و پالَانْ
لِسَرْ وانْ مَسْنَدُ و بَالَانْ
Veke carek xet û xalan
Li ser wan mesned û palan
بِخُونَه لێ مَه عَبْدَالَانْ
بِبِينِینْ عِيدُ و سَرْسَالَانْ
Bixwîne lê me ’ebdalan
Bibînin ’îd û sersalan
إِجَازَتْ دِی مَه دَسْتُورِێ
پَرِیرَنْگێ صِفَتْ حُورێ
îcazet dî me destûrê
Perîrengê sifethorê
ژِ نێڤَا ظُلْمَتُ و نُورێ
بِنۆشِێنْ مَیْ ژِ فَرْفُورِێ
Ji nêva zulmet û nûrê
Binoşîn mey di ferfûrê
ژِ دِلْ تَالَانێ خَالَانِمْ
صَبَاحُ الْخَيْرِ يَا خَانِمْ
Ji dil talanê xalan im
“Sebahu l-xeyri ya xan im”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
ژِ شَهْكَاسَا كُو قَرْقَفْ تێ
مَيَانُورِێنْ مُشَرَّفْ تێ
Ji şehkasa ko qerqef tê
Meya nûrîn muşerref tê
نِشَانَكْ دِلْبَرێ كَفْتێ
ژِ بۆ مِنْ هَرْ سَحَرْ خَفْ تێ
Nişanek dilberê keftê
Ji bo min her seher xef tê
ژِ وێ جَامێ دِنۆشِمْ أَزْ
سَحَرْ لَوْ نَىْ لِهۆشِمْ أَزْ
Ji wê camê dinoşim ez
Seher lew ney li hoş im ez
ژِ عَامێ لێ دِپۆشِمْ أَزْ
بِ جَانْ هَرْ لێ دِكۆشِمْ أَزْ
Ji ’amê lê dipoşim ez
Bi can her lê dikoşim ez
كُو غَالِبْ مَسْتُ و سَکْرَانِمْ
صَبَاحُ الْخَيْرِ يَا خَانِمْ
Ko xalib mest û sekran im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
وَرَه پێشْبَرْ «مَلَايێ» خُوه
شَهِيدُ و مُبْتَلَايێ خُوه
Were pêşber Melayê xwe
şehîd û mubtelayê xwe
بِشَفْقَتْ كَه لِقَايێ خُوه
«مَلا» نَمْرِتْ بِدَايێ خُوه
Bi şefqet ke liqayê xwe
Mela nemrit bi dayê xwe
مَسِيحَايی لِبِيمَارَانْ
كَسێ گَزْتِی دُو رَشْمَارَانْ
Mesîhayê li bîmaran
Kesên geztî du reşmaran
شَهِيدێنْ شِيرُ و مُوكَارَانْ
كِرِی آمَانْجێ نُوبَارَانْ
şehîdên şîr û mûkaran
Kirî amancê nûbaran
لِ دِيدَارَا تَه حَيْرَانِمْ
صَبَاحُ الْخَيْرِ يَا خَانِمْ
Li dîdara te heyran im
“Sebahu l-xeyri ya xanim”
وَرَه بِيناهِيَا چَهْڤَانْ
بِبِينِمْ بَژْنُ و بَالَايێ
Were bînahiya çehvan
Bibînim bejn û balayê
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
