دِلْبَرێ سَرْدَارێ خُوبَانْ أَزْ نِزَامْ آگَهْ هَيَه
دْ حَبْسُ و زِنْدَانێ أَسِيرُ و گِرْتِيێ دَرْمانْدَه يَه ؟
Dilberê serdarê xwiban ez nizam agah heye
Di hebs û zindanê esîr û girtiyê dermande ye
گِرْتِيیِمْ مَايِيمْ دِ حَبْسێ كی گَلۆ مَهْدَرْ بِكِتْ ؟
جَارَكِێ نَاڤێ مَه بِينِتْ پُڕْ ثَوَابَكْ زێدَه يَه
Girtî yem mayim di hebsê kî gelo mehder bikit
Carekê navê me bînit pir sewabek zêde ye
مِحْنَتِێ حَالێ أَسِيرَانْ كێ لِمِيرَانْ عَرْضَه كِتْ
دێ بِتِنْ پُرْسێ لِمِنْ لَوْ پُڕْ بِرَحْمُ و شَفْقَه يَه
Mihnet û halê esîran kî li mîran `erde kit
Dê bitin pirsê li min lew pir bi rehm û şefqe ye
گَرْ بِپُرْسِتْ جَارَكِێ خَاتُونْ لِحَالێ سُخْتَهيی
قُفْلُ و زِنْجِيرْ دێ ڤَبِنْ بێ اِسْمُ و دَسْتُ و مِفْتَهيَه
Ger bipirsit carekê xatûn li halê suxteyî
Qufl û zincîr dê vebin bê ism û dest û mifte ye
بَنْدُ و زِنْجِيرْ دێ ڤَبِنْ جَرْحِێنْ دِ كُلْ دێ خُوشْ بِكِتْ
لَوْ كُو نَاڤێ دِلْبَرێ دَرْمانێ دَرْدێ بَنْدَهيَه
Bend û zincîr dê vebin curhên di kul dê xweş bikit
Lew ko navê dilberê dermanê derdê bende ye
هَرْ چِه بِیڤِێرێ كُو نَاڤێ دِلْبَرێ بێتِنْ لِسَرْ
خُوَشْ دِبِتْ هادِرْ دِ گاڤێ بێ گُمَانُ و شُبْهَهيَه
Herçi bîvêrê ko navê dilberê bêtin li ser
Xweş dibit hadir di gavê bêguman û şubhe ye
بێ گُمَانْ خَاكَا رِيَا وێ تُوتِيَا وُ دَانَهيَه
گَرْ دِ چَهْڤێنْ كُۆرْ ڤَه اِينِنْ خُوش دِبِنْ بێ دِيدَهيَه
Bêguman xaka riya wê tûtiya û dane ye
Ger di çehvên kor ve înin xweş dibin pê dîde ye
مَیِّتێ سَدْسَالَه ژِی وێ رێ ڤِبَرْ قَبْرێ كَڤِتْ
دێ ڤَژِی رُوحْ بێتَه سَرْ سَاتَا خُوه بێتِنْ زِنْدَهيَه
Meyyitê sedsale jî wê rê vi ber qebrê kevit
Dê vejî rûh bête ser sata xwe bêtin zinde ye
مَیِّتانْ أَوْ رَادِكِتْ يَكْسَرْ دِلَانْ يَغْمَا دِكِتْ
اِسْمێ أَعْظَمْ مَا دِزَانِتْ يَا مَسِيحَا أَوْ بْخُوه يَه ؟
Meyyitan lew radikit yekser dilan yexma dikit
Ismê e`zem ma dizanit ya mesîha ew bi xwe ye
أَزْ دِبێمْ عِيسَايَه أَوْ ، يَا بُو عَلِی سِينَايَه أَوْ
لَوْ بِرَمْزُ و عِشْوَیَانْ پُڕْ مُعْجِزَاتُ و شِيوَه يَه
Ez dibêm `îsa ye ew ya Bû-`Elî Sîna ye ew
Lew bi remz û `işweyan pir mu`cizat û şîwe ye
شِيوَه وُ رَمْزِێنْ دِ وێ تَشْبِيهێ بَرْقێ لَامِعِنْ
كێوێ قَافْ بِتْ كَر دِكِتْ سَاتَا خُيَا بِتْ پَرْدَه يَه
şîwe û remzên di wê teşbîhê berqê lami` in
Kohê Qaf bit ger dikit sata xwiya bit perde ye
پَرْدَهیَا مَحْبُوبْ دِ نێڤْ قَلْبَانْ كُو دێ كَرْکَرْ بِكِتْ
قَطْ دِ پَرْدێ خَفْ دِبِنْ خُرْشِيدُ و مَاهُ و زُهْرَه يَه
Perdeya mehbûb di nêv qelban ko dê ker ker bikit
Qet di perdê xef dibin Xurşîd û Mah û Zuhre ye
زُهْرَه وُ خُرْشِيدُ و مَهْ مِنْ دِينْ دِ قَوْسێ هَمْقِرَانْ
سُرّی دَا دِلْ عَقْرَبَانْ چَرْخُ و سَمَا وُ هَیْهَیَه
Zuhre û Xurşîd-i min dîtin di qewsê hemqeran
Surrê da dil `eqreban çerx û sema û hey-hey e
عَقْرَبُ و قَوْسێ قُزَحْ ڤێرَا مُقَابِلْ مُشْتَرِی
رۆژُ و شَڤْ نُورْ وێ دِرێژِنْ بَرْقێ دَايَه سُپێدَه يَه
`Eqreb û qewsê qezeh vê ra muqabil Muşterî
Roj û şêv û nûr û tîrêj berq û hem ispêde ye
أَوْ حَمِی ڤێكْرَا مَه دِينْ تێکِلْ دِ چَرْخِی جَارَكِێ
هَرْ ژِ وَانْ بێ حَالِمْ أَزْ أَحْوَالُ و عِشْقُ و جَذْبَه يَه
Ew hemî vêk ra mi dîn têkil di çerxê carekê
Hê ji wan bêhal im ez ehwal û `işq û cezbe ye
حَالْ ژِ وێ رَمْزێ گِهَا مِنْ مَسْتێ وێ رَمْزێمَه هێژْ
سَرْخُوشِمْ حَتَّا أَبَدْ بێ جَامُ و نَقْلُ و بَادَه يَه
Hal ji wê remzê giha min mestê wê remzê me hêj
Serxweş im hetta ebed bê cam û neql û bade ye
سَرْخُوشِمْ بێ جَامُ و مَیْ رَمْزَا نِهِينْ أَبْتَرْ كِرِمْ
نَاگِهَانْ تِيرْ دَانَه دِلْ لَوْ كُشْتِ هَادِرْ سُخْتَه يَه
Serxweş im bê cam û mey remza nihên ebter kirim
Nagihan tîr dane dil lew kuşt e hadir suxte ye
كُشْتِيَانْ خُونْ دِی لِقَالِبْ لَوْ بِوِی دێ خُوشْ بِبِنْ
هێڤِيَانْ قَطْ نَابِرَّمْ مَقْصُودْ مَه دِيدَارَا تَه يَه
Kuştiyan xewn dî liqa`ê lew bi wê dê xweş bibin
Hêviyan qet nabirim meqşûd me dîdara te ye
هێڤِيَانْ قَطْ نَابِرَّمْ جَارَكْ تُو بێیِی شَفْقه كِی
عَقْدێ اِحْرَامێ گِرێ دِمْ هادِرِی بِمْ سَجْدَه يَه
Hêviyan qet nabirim carek tu bêyî şefqe kî
`Eqdê ihramê dê bînim hadirî bim secde ye
سَجْدَهيَا بَرْ أَسْوَدَانْ نَادِمْ بِسَدْ حَجْ أَكْبَرَانْ
سُونْدْ دِخُومْ بْوَانْ زُلْفُ و خَالَانْ هَچْوَكِی بێژِمْ وَه يَه
Secdeya ber eswedan nadim bi sed hecekberan
Sond bi wan zulfan û xalan heçwekî bêjim we ye
سُونْدْ بِوێ زُلْفَا سِيَاهْ أَزْ عَابِدێ حُسْنَا تَه مَه
خَفْ دِنۆشِمْ ڤێ شَرَابێ خُوَشْ شَرَابُ و قَهْوَه يَه
Sond bi wê zulfa siyah ez `abidê husna te me
Xef dinoşim vê şerabê xweş şerab û qehwe ye
عُمْرَكَه دْسۆژِمْ بِخَفْ چَهْڤْنێرێ يَكْ پُرْسَكْ تَه مَه
دَا بَيَانْ كِمْ شَرْحێ حَالێ دِلْ بِحَرْفُ و نُكْتَه يَه
`Umrek e d’sojim bi xef çehvnêrê yek pirsek te me
Da beyan kim şerha halê dil bi herf û nukte ye
سَدْ هَزَارْ بَارْ شاكِرِمْ أَزْ كُو ژِ بَلْقِيسَا پَرِی
هُدْهُدێ شِرِينْزَبَانْ اِيرۆ خَبَرْدَارێ مَه يَه
Sed hezar bar şakir im ez ko ji Belqîsa perî
Hudhudê şîrînzeban îro xeberdarê me ye
اِسْمُ و نَاڤێ تَهيْ شَرِيفْ خُوشْ كِرْ لِمِنْ قَلْبێ مِرِی
لَوْ دِ مَدْحێ تَه وْ ثَنَایێ بُويِمَه چَنْگُ و نَيَه
Ism û navê tey şerîf hey kir li min qelbê mirî
Lew di medhê te û senayê bûyî me çeng û ney e
شُبْهَتێ چَنْگێ دِنَالِمْ هێژْ ژِ دَسْتْ دَاغَا قَدِيمْ
هَرْ وَكِی مَشْعَلْ دِسۆژِمْ دۆسْتْ نِزَامْ آگَهْ هَيَه ؟
şubhetê çengê dinalim hêj ji dest daxa qedîm
Herwekî meş`el disojim dost nizam ageh heye
مِنْ دِڤێ سَرْ لَآسِتَانێ هَرْ وَكِی تۆلَانْ نِهِمْ
بَلْكِی جَارَكْ گَیْلْ بِپُرْسِتْ أَڤْ چِه مَحْرُومْ تَوْلَه يَه ؟
Min divê ser li asitanê herwekî tolan nihim
Belki carek keyl bipirsit ev çi mehrûm tole ye
گَرْ بِنَاڤێ تۆلَيَانْ جَارَكْ ڤَخُونِتْ بَنْدهيی
«بِمَلێ» خُوشْتِرْ ژِ مَالُ و گَوْهَرُ و گَنْجِينََه يَه
Ger bi navê toleyan carek vixwînit bendeyî
Bi Melê xweştir ji mal û gewher û gencîne ye
گَوْهَرُ و گَنْجێنْ «مَلێ» حُسْنُ و جَمَالا دِلْبَرَه
سَدْ «تَعَالَى اللّٰهْ تَبَارَكْ» أَڤْ چِه حُسْنُ و جِلْوَه يَه
Gewher û gencên Melê husn û cemala dilber e
Sed te`ale l-lah tebarek ev çi husn û cilwe ye
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
