جَانَا ژِ جَمَالَا تَه مُقَدَّسْ قَبَسِمْ أَزْ
گَرْ خُوبُ و پَرِيزَادَه نَظَرْ كِى تَه بَسِمْ أَزْ
Cana ji cemala te muqeddes qebes im ez
Ger xob û perîzade nezer kî te bes im ez
مِثْلێ مَهێ نُو گَرْ تَه دِڤێتِنْ مَه بِبِينِى
مێزَه بِكَه جَامێ تُو دِزَانِى چِه كَسِمْ أَزْ
Mislê mehê new ger te divêtin me bibînî
Mêze bike camê tu dizanî çi kes im ez
يَغْمَا ژِ مِه جَانْ كِرْ كُو تَجَلَّايێ لِدِلْ دَا
مِنْ رُوحێ دِ قَالِبْ تُو يِى تَنْهَا قَفَسِمْ أَزْ
Yexma ji me can kir ko tecellayê li dil da
Min rûhê di qalib tu yî tenha qefes im ez
حُبَّا تَه يه مِنْ رادِهَژِينِى كُو بِنَالِمْ
شَبْ تَا بِ سَحَرْ نَالَه ژِ رَنْگێ جَرَسِمْ أَزْ
Hubba te ye min radihejînî ko binalim
şeb ta bi seher nale ji rengê ceres im ez
مِنْ گۆ: مَهێ نُو چاشِتِيێ أَبْرُويێ يارِى
گۆت: مِنْ چِه حَدَه شُبْهَتێ نَعْلێ فَرَسِمْ أَزْ
Min go mehê new çaşitiyê ebrûyê yarê
Go min çi hed e şubhetê ne’lê feres im ez
سَاقِى ژِ أَزَلْ يَكْ دُو قَدَحْ بَادَه بِمِنْ دَا
حَتَّى بِ أَبَدْ مَسْتُ و خُمَارُ و تَلَسِمْ أَزْ
Saqî ji ezel yek du qedeh bade bi min da
Hetta bi ebed mest û xumar û teles im ez
جَانَا تُويِى مِنْ جَانْ گُلێ بێ خَارْ چِه كَرَمْ بێ
مِنَّتْ كُو نَه وَكْ بُلْبُلێ مِحْنَتْ عَبَسِمْ أَزْ
Cana tu yî min can gulê bêxar-i gerem bî
Minnet ko ne wek bilbilê mihnet ’ebes im ez
سَدْ جَوْرُ و جَفَا دی بِمَه نَاچِينْ ژِ دَرێ تَه
يَكْسَرْ تُو نَبَاتِىُ و لِطَبْعێ مَگَسِمْ أَزْ
Sed cewr û cefa dî bi me naçîn ji derê te
Yekser tu nebat î we li teb’ê meges im ez
گَرْ وَه تَه دِڤێتِنْ بِبِرَّى سَرْ بِكَه فَرْمانْ
دَا ڤێ سَاعَتێ سَرْ بِبِرَّمْ خُوشْ مَقَسِمْ أَزْ
Ger we te divêtin bibirî ser bike ferman
Da vê se’etê ser bibirim xweş meqes im ez
سَرْ تَا بِ قَدَمْ أَرْ بِسۆژِمْ شُبْهێ «مَلَایی»
پَرْوَانَه صِفَتْ سۆهْتِمُ و بێ صَوْتُ و حَسِمْ أَزْ
Ser ta bi qedem ez bisojim şubhê Melayî
Perwanesifet sohtim û bêsewt û his im ez
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
