دَسْتِێ قُدْرَتْ كُو هِلَاڤێتِ ژِ بَژْنَا ته نِقَابْ
بِجَمَالَا جَبَرُوتِێ مه نَمَانْ پَرْده وْ حِجَابْ
Destê qudret ko hilavêt ji bejna te niqab
Bi cemala ceberûtî me neman perde û hicab
لِگُلِێنْ تَهىْ تَرُ وُ نَازِكْ كُو سَحَرْ گِرْتِي خُنَاڤ
دِ أَبَارِيقُ و قِنِينَانْ ژِ حَسَدْ سۆهْتِي گُلَابْ
Li gulên tey ter û nazik ko seher girtî xwinav
Di ebarîqê qinînan ji hesed şohtî gulab
عَيْنِێ كَافُوره بِمَشْرَبْ مه ژِ حُسْنَا ته يه صَافْ
لَوْ ژِ عِشْقَا ته دِ دِلْ دَا مه ڤَبُو عِلْمێ عُبَابْ
’Eynê kafûrî ye meşreb me ji husna te ye şaf
Lew ji ’işqa te di dil da me vebû ’ilmê ’ubab
مِه ژِ سَرْچَشْمَهيِێ حَيْوَانْ قَدَحَكْ صَافِي ڤَخُوارْ
نَاگَهِينْ لَذَّتُ و شَوْقَا مه بِسَدْ جِلْدێ كِتَابْ
Me ji ser çeşmeyê heywan qedehek şafî vexwar
Nagihî lezzet û zewqa me bi sed cildê kitab
لَوْ دِ چَنْگِێ مه دِخُونِي كُو دِ عِشْقَا ته بِسَازْ
مه بِبَژْنَا تِه دِخُونِنْ نَیُ و قَانُونُ و رَبَابْ
Lew di çengê me dixwînî ko di ’işqa te bi saz
Me bi bejna te dixwînin ney û qanûn û rebab
قَهْوَه يَا تَلْخِ دِگَلْ زَهْرِێ هَلَاهِلْ بِدَرِی
مه ژِ دَسْتِێ ته مُبَارَكْ شَكَرْآمِيزِه گُلَابْ
Qehweya telxê digel zehra helahil biderî
Me ji destê te mubarek şekeramêz e gulab
قُلْزَمِێ عِشْقِێ ژِ بَايِێ خُوه مُخَالِفْ دَمَكێ
ته هُمَا هَاته عَجَاجێ مه لِسَرْ دَسْتِێ غُرَابْ
Qulzemê ’işqê ji bayê xwe muxalif demekê
Di hemamatê ’ecacê me li ser destê xirab
سَحَرێ خِضْرێ عِنَايَتْ كُو بِرِينْ چَشْمَه يِێ دِلْ
بِجِهَانِێ مه نَظَرْ دَا كُو جِهَانْ عَيْنِی سَرَابْ
Seherê Xudrê ’inayet ko birîn çeşmeyê dil
Bi cehanê me nezer da ko cehan ’eyn-i serab
بِحَبَابِێ مَبه مَغْرُورْ وَهه سَرْگَشْته «مَلَا»
بَا ڤِبَرْ كَفْتِيه وِێ بێدَمه سَرْگَشْته حَبَابْ
Bi hebabê mebe mexrûr wihe sergeşte Mela
Ba vi ber keftiye wê beyhude sergeşte hebab
دِێ مه هُدْهُدْ ژِ سَبَا بِێتُ و نِزَانِينْ چِيه حَالْ
كُو لِ حَالِێ مه غَرِيبَانْ نه سُؤَالِه وْ نه جَوَابْ
We ye hudhud ji Seba bêt û bizanîn çi ye hal
Ko li halê me xerîban ne su’al û ne cewab
هَرْدُو بِرْهێنْ تَنه مِحْرَابِ چِه إِيمَانْ چِه كُفِرْ
بُودُ و نَابُودْ كُو يَكِنْ أَڤْ چِه ثَوَابُ و چِه عِقَابْ
Herdu birhên te ne mihrab-i çi îman û çi kufr
Bûd û nabûd ko yek in ev çi sewab û çi ’iqab
وَره نِیشَانِێ نِشَانِی ده خُوه بێ پَرْده سَحَرْ
لێ ژِ خُونِێ بِكه پَرْهِیزْ كُو شَهِيدَانْ چِه حِسَابْ
Were nîşanê Nişanî de xwe bêperde seher
Lê ji xwînê bike perhîz ko şehîdan çi hisab
15. yüzyılda Cizre'de yaşamış olan Ahmed Cüzeyrî'nin (Molla Cüzeyrî) Divan'ı.
